|
|
|
|
|
|
|
|
|
|
|
|
இலங்கையில் வருடாந்த இயற்கை இறப்பர் உற்பத்தியை 60 வீதத்தால் அதிகரிக்கும் நோக்கில் அடுத்த சில ஆண்டுகளில் இறப்பர் பயிர்ச்செய்கை தலைமைத் திட்டத்தை நடைமுறைப்படுத்த கமத்தொழில் மற்றும் பெருந்தோட்ட கைத்தொழில் அமைச்சு நடவடிக்கை எடுத்துள்ளது.
இதனாலேயே உலர் வலயத்திற்குட்பட்ட மொனராகலை, அம்பாறை, பதுளை போன்ற பிரதேசங்களில் 100,000 ஏக்கர்களில் இறப்பர் செய்கையை ஆரம்பிக்க திட்டமிடப்பட்டுள்ளதாக கமத்தொழில் மற்றும் பெருந்தோட்ட கைத்தொழில் அமைச்சர் திரு மகிந்த அமரவீர குறிப்பிட்டார்.
நேற்று (31) காலை தொழில்நுட்ப தகவுதிறன் இறப்பர் உற்பத்தியில் (Technically Specified Rubber - TSR) ஈடுபட்டுள்ள கைத்தொழில்துறையினருடன் இடம்பெற்ற கலந்துரையாடலில் அமைச்சர் இதனைக் குறிப்பிட்டுள்ளார். தற்போது, TSR நாட்டில் 10 இப்பர் மைய உற்பத்தி தொழிற்சாலைகளை கொண்டுள்ளது. தமது தயாரிப்புகளுக்கு பயன்படுத்தும் TSR இறப்பருக்கு பயன்படுத்தப்படுவது மரப்பால் வெட்டும்போது அகற்றப்படும் இறப்பர் மர சரிகைகளாகும்.
ஆனால் தற்போது உற்பத்தி திறனில் நூற்றுக்கு 30 சதவீதம் பயன்படுத்தப்பட்டு வருவதாகவும், இறப்பர் மர சரிகைகள் பற்றாக்குறை அதனை பாதித்துள்ளதாகவும் தொழில்துறையினர் தெரிவித்தனர்.
இந்தக் கலந்துரையாடலில் கருத்து தெரிவித்த அமைச்சர், மொனராகலை உள்ளிட்ட மூன்று மாவட்டங்களில் 100,000 ஏக்கர்களில் இறப்பர் செய்கையை விஸ்தரிப்பதற்கு தேவையான தலைமைத் திட்டம் தயாரிக்கப்பட்டுள்ளதால் அதனை நடைமுறைப்படுத்துமாறு இறப்பர் அபிவிருத்தி திணைக்களத்திற்கு பணிப்புரை விடுத்தார்.
மேலும் அதிக பாலை பெற்றுக் கொள்ளக் கூடிய இறப்பர் இனங்களை உற்பத்தி செய்வதற்கான புதிய குளோன்களை கண்டறியும் ஆராய்ச்சியை துரிதப்படுத்துமாறு இறப்பர் ஆராய்ச்சி நிறுவகத்திற்கு அறிவுரைகளை வழங்கினார்.
தற்பொழுது TSR இறப்பர் மைய பொருட்களை உற்பத்தி செய்யும் தொழிற்சாலைகளுக்கு போதியளவு இறப்பர் மர சரிகைகள் இல்லாததால் அவற்றுக்கு பதிலாக கட்டியான இறப்பர் பாலை (Cup Lumps) இறக்குமதி செய்வதற்கு தற்காலிகமாக அனுமதி வழங்க அமைச்சரவை தீர்மானித்ததாகவும் அவர் குறிப்பிட்டார்.
தற்போது, எமது நாட்டில் 60,240 மெற்றிக் டொன்னுக்கான கேள்வி இருந்தாலும் இந்த நாட்டில் 17,225 மெற்றிக் டொன் மட்டுமே உற்பத்தி செய்யப்படுகின்றது. இதன்காரணமாக, உள்நாட்டு இறப்பர் மர சரிகைகள் தொழிலை பாதுகாக்கும் வகையில் TSR இறக்குமதிக்கு தற்காலிகமாக அனுமதி வழங்கப்பட்டுள்ளதாக அமைச்சர் சுட்டிக் காட்டினார்.
களுத்துறை மாவட்டத்தில் உள்ள காணிகளில் இறப்பரை பயிரிடுவதற்கு இனிமேல் அனுமதி வழங்கப்படாது எனவும் அமைச்சர் மேலும் தெரிவித்தார். களுத்துறை மாவட்டத்தில் உள்ள நிலங்களில் இறப்பரை பயிரிடுவதால் கிடைக்கும் வருமானத்தை விடவும் அதிக வருமானம் கிடைப்பதும், மசாலாப் பயிர்ச் செய்கைக்கான அதிக சாத்தியக் கூறுகள் இருப்பதும், அத்துடன் மிளகு போன்ற வாசனைப் பொருட்களைப் பயிரிடுவதன் மூலமும் அதிக வருமானம் கிடைப்பதும் உறுதி செய்யப்பட்டுள்ளமை அதற்கான காரணமாகும் எனவும் அமைச்சர் சுட்டிக் காட்டினார்.
இந்தக் கலந்துரையாடலில் இறப்பர் ஆராய்ச்சி நிறுவகத்தின் தலைவர் சரத் சந்திரசிறி மற்றும் அமைச்சின் அதிகாரிகள் மற்றும் TSR மைய கைத்தொழில்துறையினர் என பலரும் கலந்து கொண்டனர்.
