කුකුළු පාලනය සඳහා අවශ්‍ය මව් සතුන් ආනයනය 80,000 සිට 10,000 දක්වා අවම වී ඇති බැවින් කුකුළු පාලන කර්මාන්තයේ අනාගතය පිළිබඳව සතුටු විය නොහැකි බව කෘෂිකර්ම අමාත්‍ය මහින්ද අමරවීර මහතා පවසයි.

අද (23) වන දින පෙරවරුවේ පේරාදෙණිය සත්ව නිෂ්පාදන හා සෞඛ්‍ය දෙපාර්තමේන්තුවේ ප්‍රගතිය පිළිබඳව සමාලෝචන රැස්වීමක් එම කාර්යාලයේදී පැවැතිවිණි. කෘෂිකර්ම, වනජීවි හා වනසම්පත් සංරක්ෂණ අමාත්‍ය මහින්ද අමරවීර මහතාගේ ප්‍රධානත්වයෙන් පැවති එම සාකච්ඡාවේදී ශ්‍රී ලංකාවේ දියර කිරි කර්මාන්තයේත් බිත්තර හා කුකුළු මස් නිෂ්පාදන කර්මාන්තයේත් ඉදිරි සංවර්ධන කටයුතු පිළිබඳ පුළුල් ලෙස සාකච්ඡා කරනු ලැබීය.

එම අවස්ථාවට කෘෂිකර්ම රාජ්‍ය අමාත්‍ය මොහාන් ද සිල්වා මහතා සහ එම දෙපාර්තමේන්තුවේ අධ්‍යක්ෂිකා ආචාර්ය කේ. ඒ. සී. එච්. ඒ. කොතලාවල මහත්මිය සහභාගී විය.

එහිදී අනාවරණය වූ කරුණූ අතර කුකුළු පාලන කර්මාන්තය ආශ්‍රිත නිෂ්පාදනවල, කුකුළු මස් හා බිත්තර නිෂ්පාදන අංශයෙන් පසුගිය කාලය තුළ ශ්‍රී ලංකාව ස්වයංපෝෂිත තත්ත්වයට ළඟා වී තිබුණත් වර්තමානයේ ආර්ථික අර්බුදයත් සමඟ සත්ව ආහාර සඳහා යොදා ගන්නා ද්‍රව්‍යවල සහ ඖෂධවල මිල ඉහළ යාමත්, කුකුළු පාලනයට අවශ්‍ය මව් සතුන් ආනයනය කරන ප්‍රමාණය 80,000 සිට 10,000 දක්වා පහත වැටීමත් විශාල බලපෑමක් එල්ලකර ඇති බව සඳහන් විය.

මෙම තත්ත්වය වලක්වා ගැනීම සඳහා රජය වශයෙන් කෙටිකාලීන, මධ්‍යකාලීන සහ දිගුකාලීන වැඩපිළිවෙලක් සැකසීම සඳහා අමාත්‍ය මණ්ඩලයේ අවධානය යොමු කිරීම පිණිස අමාත්‍ය මණ්ඩල සටහනක් ඉදිරිපත් කිරීමට කටයුතු කරන බව කෘෂිකර්ම අමාත්‍ය මහින්ද අමරවීර මහතා සඳහන් කළේය. ශ්‍රී ලංකාවේ ජනතාවගේ පෝෂණ තත්ත්වයන් නංවාලීම සඳහා දියරකිරි, බිත්තර හා කුකුළුමස් නිෂ්පාදනය ඉහළ නැංවීම සිදුකළයුතු බවත් විශේෂයෙන් ම සත්ව ආහාර සඳහා යොදාගන්නා බඩඉරිඟු හා සෝයා අප රටේම නිපදවන වැඩපිළිවෙල මෙම කන්නයේ සිට අරඹන බවත් අමාත්‍යවරයා සඳහන් කළේය.

මෙහිදී වැඩිදුරටත් අදහස් පළකළ ඇමතිවරයා - “අප රටේ කුකුළු මස් හා බිත්තර නිෂ්පාදනය සම්බන්ධයෙන් දැනට පවතින තත්ත්වය ගැන සතුටු විය නොහැක. එම නිසා කඩිනමින් මෙම කර්මාන්තය කඩා වැටීම වළක්වා ගැනීම සඳහා වැඩසටහනක් සකස් කළ යුතුව තිබේ. ශ්‍රී ලංකාවේ කුකුළු මස් සහ බිත්තරවල ප්‍රමිතිය ඉහළම තත්ත්වයෙන් පවතින බැවින් එම නිෂ්පාදන ඉහළ දැමුවහොත් දින 45 ක් වැනි කෙටි කාලයක දී ඩොලර් උපයා ගැනීමේ හැකියාව ඇතැයි” ද අමාත්‍යවරයා සඳහන් කළේය.

ශ්‍රී ලංකාවේ වන අලිගහනය 7000 දක්වා ඉහළට.

ශ්‍රී ලංකාවේ වනඅලිගහණය මේ වනවිට 7000 දක්වා ඉහළ ගොස් ඇතැයි වනජීවි දෙපාර්තමේන්තුව සඳහන් කරයි.

මෙතෙක් ශ්‍රී ලංකාවේ වනඅලි ගහනය පිළිබඳව සඳහන් වුයේ එම සතුන් ප්‍රමාණය 5600ක් පමණ වන බවයි.

නමුත් මෑතක දී සිදු කළ ගණනයන් අනුව මෙරට වනඅලි ගහනය 7000 ඉක්මවා ඇති බව වනජීවි දෙපාර්තමේන්තුව සඳහන් කළේ කෘෂිකර්ම , වනජීවි හා වනසම්පත් සංරක්ෂණ අමාත්‍ය මහින්ද අමරවීර මහතා සමග පැවැති සාකච්ඡාවකදීය.

එමෙන්ම ශ්‍රී ලංකාව තුළ සිටින දළ ඇතුන් ප්‍රමාණයේ අවමවීමක් ද වාර්තා වේ. දැනට වාර්තා වන පරිදි මෙරට වනාන්තර තුළ සිටින දළ ඇතුන් සංඛ්‍යාව 142ක් බව ද වනජීවි දෙපාර්තමේන්තුව සඳහන් කළේය.

මින්නේරිය, ගිරිතලේ හා පරාක්‍රම සමුද්‍රය ආශ්‍රිතව ගැවසෙන වනඅලි 350ක් පමණ ආගිය අතක් නැති නැතැයි පසුගිය දිනෙක මාධ්‍ය විසින් පළ කර තිබිනි. මේ සම්බන්ධව ද අමාත්‍යවරයා වනජීවි දෙපාර්තමේන්තුවෙන් විමසීමක් කළේය.

ගිරිතලේ, මින්නේරිය හා පරාක්‍රම සමුද්‍රය මෙම වර්ෂය පුරාම ජලයෙන් පිරී පැවැති හෙයින් වනඅලින්ට ආහාර සපයා ගැනීමට පැමිණෙන වැව්පිටිය ජලයෙන් පිරී ඇති නිසා වනඅලින්ගෙන් විශාල පිරිසක් වෙනත් ප්‍රදේශවලට ආහාර සොයා සංක්‍රමණය වී ඇතැයි වනජීවි නිලධාරිහු අවධාරණය කළහ.

වනඅලින් වෙනත් ප්‍රදේශවලට සංක්‍රමණය වීම හේතුවෙන් එම ප්‍රදේශවල ජනතාවට වනඅලින්ගෙන් සිදුවන හානි ඉහළගොස් ඇති බව ද මෙහිදී අනාවරණය විය.

හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනයේ සභාපති ධූරයට ආචාර්ය ගොයිගොඩගමගේ බන්දුල මහතා පත් කෙරේ.

කෘෂිකර්ම අමාත්‍යාංශයට අයත් ආයතනයක් වන හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනයේ නව සභාපතිවරයා වශයෙන් කෘෂිකර්ම, වනජීවි හා වන සම්පත් සංරක්ෂණ අමාත්‍ය මහින්ද අමරවීර මහතා විසින් ආචාර්ය ගොයිගොඩගමගේ බන්දුල මහතා අද (20) දින සිට පත් කරනු ලැබීය.

Read more: හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනයේ සභාපති ධූරයට ආචාර්ය ගොයිගොඩගමගේ බන්දුල...

අඹේවෙල මිල්කෝ කර්මාන්ත ශාලාවේ ඉන්ධන වංචාවට සම්බන්ධ සියලු සේවකයින් අනිවාර්ය නිවාඩු යැවීමට තීරණය කරයි.

මිල්කෝ සමාගමට අයත් අඹේවෙල කර්මාන්ත ශාලාවේ මහා පරිමාණ ඩිසල් වංචාවක් සම්බන්ධයෙන් එහි සභාපති රේණුක පෙරේරා මහතා අද දින පෙරවරුවේ කෘෂිකර්ම,වනජීවි හා වනසම්පත් සංරක්ෂණ අමාත්‍ය මහින්ද අමරවීර මහතා දැනුම්වත් කළේය.

2021 සිට මෙම ආයතනය තුළ මෙම ඉන්ධන වංචාව සිදුවී ඇති බවට තොරතුරු ලැබී ඇතැයි කී සභාපතිවරයා ඩීසල් ලීටර් 45,000කට අධික ප්‍රමාණයක් පුද්ගලික ඉන්ධනහල්වලට විකුණා ඇති බවට තොරතුරු ලැබී ඇති බවද අවධාරණය කළේය.

මේ සම්බන්ධව පුළුල් විමර්ශනයක් මේ වනවිට ආරම්භ කර ඇතත්, මෙම වංචාවට සම්බන්ධව බවට දැනට චෝදනා එල්ල වී ඇති සියලු සේවකයින් විමර්ශන අවසන් වන තෙක් අනිවාර්ය නිවාඩු යැවීමට පියවර ගන්නා බව රේණුක පෙරේරා මහතා කෘෂිකර්ම අමාත්‍යවරයාට දැනුම් දුන්නේය.

මෙම ඉන්ධන වංචාව මෙම වර්ෂය තුළ දීත් සිදු වී ඇත්ද යන්න සම්බන්ධව පුළුල් විමර්ශනයකින් සොයා බලන්නැයී අමාත්‍යවරයා සභාපතිවරයාට උපදෙස් දුන්නේය.

Read more: අඹේවෙල මිල්කෝ කර්මාන්ත ශාලාවේ ඉන්ධන වංචාවට සම්බන්ධ සියලු සේවකයින් අනිවාර්ය නිවාඩු යැවීමට තීරණය...