පශු සම්පත් අංශය

1.පශු සම්පත් අංශය පිළිබඳ කෙටි හැඳින්වීම

කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය, 2024 නොවැම්බර් මස 25 වැනි දින ශ්‍රී ලංකා ප්‍රජාතාන්ත්‍රික සමාජවාදී ජනරජයේ 2412/08 අංක දරණ අති විශේෂ ගැසට් පත්‍රය මගින් ස්ථාපිත කර ඇති අතර, පරිපාලනයේ පහසුව උදෙසා කෘෂිකර්ම, පශු සම්පත්, ඉඩම් සහ වාරිමාර්ග ලෙස අංශ හතරකට බෙදා ඇත. ඒ අනුව පශු සම්පත් අංශයට අදාළ තොරතුරු පහත පරිදි වේ.

v හැඳින්වීම

පශු සම්පත් අංශය මගින් පශු සම්පත් ක්ෂේත්‍රයේ උන්නතිය උදෙසා ප්‍රතිපත්ති හා සැලසුම් සකස් කිරීමත්, දේශීය නැවුම් කිරි නිෂ්පාදනයෙන් ස්වයංපෝෂිත වීමේ ඉලක්කය ප්‍රමුඛව දේශීය කිරි නිෂ්පාදකයා ශක්තිමත් කරමින් දේශීය කිරි කර්මාන්තය නැංවීම මෙන්ම එළු‚ කුකුළු‚ සූකර ඇතුළු අනෙකුත් උප අංශ සංවර්ධනය කර තත්ත්වයෙන් උසස් ගුණාත්මක සත්ත්ව නිෂ්පාදන ප්‍රවර්ධනය හා පරිසර හිතකාමී ලෙස සත්ත්ව පාලනයේ යෙදීම දිරිගැන්වීම උදෙසා දේශීය සහ විදේශීය අරමුදලින් මූල්‍යනය වන විවිධ වැඩසටහන් හා ව්‍යාපෘති ක්‍රියාත්මක කරනු ලබයි.

එමෙන්ම, වඩාත් සෞඛ්‍යාරක්ෂිත සහ ගුණාත්මක ආකාරයෙන් සත්ත්ව නිෂ්පාදන වෙළෙඳපොළට ඉදිරිපත් කිරීම මගින් ඉහළ යන දේශීය ඉල්ලුම සපුරාලීම සහ එමගින් පශු නිෂ්පාදන ආනයනය සඳහා වාර්ෂිකව වැය වන විදේශ විනිමය සීමා කිරීම යන අරමුණු පෙරදැරිව පශු සම්පත් සංවර්ධන අංශය කටයුතු කරනු ලබයි.

2.පශු සම්පත් අංශයට අදාළ කාර්යයන්

2024 නොවැම්බර් මස 25 වැනි දින අංක 2412/08 අංක දරණ අති විශේෂ ගැසට් පත්‍රය අනුව කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශයට පැවරුනු කාර්යයන් අතරින් පශු සම්පත් අංශයට අදාළ විෂයයන් හා කාර්යයන් පහත පරිදි වේ.

• රජය මගින් ක්‍රියාත්මක කරනු ලබන ජාතික ප්‍රතිපත්තීන් මත පිහිටා කෘෂිකර්ම, පශු සම්පත්, ඉඩම් සහ වාර්මාර්ග විෂයන්ට සහ අදාළ දෙපාර්තමේන්තු හා ව්‍යවස්ථාපිත ආයතන හා රාජ්‍ය සංස්ථාවන්හි විෂයන්ට අදාළ ප්‍රතිපත්ති, උපායමාර්ග, වැඩසටහන් සහ ව්‍යාපෘති සම්පාදනය කිරීම, ක්‍රියාත්මක කිරීම, පසු විපරම් කිරීම හා ඇගයීම
• අමාත්‍යාංශ විෂය පථයට අයත්වන මහජන සේවාවන් කාර්යක්ෂමව හා මහජන හිතකාමී අයුරින් ලබා දීම
• නාස්තිය හා දූෂණය පිටු දකිමින් අමාත්‍යාංශයේ කාර්යභාරය ඉටු කිරීම සහතික කිරීමට ඉවහල් වන ආකාරයට නවීන කළමනාකරණ ක්‍රම හා තාක්ෂණය යොදා ගනිමින් සියලුම ක්‍රම සහ විධි ප්‍රතිසංස්කරණය කිරීම
• පශු සම්පත් අංශයේ නිෂ්පාදනය ඉහළ නැංවීම සඳහා අවශ්‍ය වන පහසුකම් සැපයීම
• සත්ත්ව සුබසාධනය හා ඒ සම්බන්ධ කටයුතු  
• නවීන තාක්ෂණය යොදා ගනිමින් පශු සම්පත් සම්බන්ධ පර්යේෂණ අංශය පුඵල් කිරීම හා එහි ප්‍රතිඵල මත නිපැයුම් ක්ෂේත්‍රය ගුණාත්මකව හා ප්‍රමාණාත්මකව වර්ධනය සඳහා අවශ්‍ය පියවර ගැනීම

• පශු ක්ෂේත්‍රයේ සත්ත්ව ගහනය වැඩි දියුණු කිරීම සඳහා විද්‍යාත්මක බෝ කිරීමේ ක්‍රම ප්‍රචලිත කිරීම සහ එම සතුන් රෝග වලින් ආරක්ෂා කිරීම හා නිරෝධායනය කටයුතු
• විවිධ භූගෝලීය අවශ්‍යතාවයන්ට ගැලපෙන පරිදි කුඩා හා මධ්‍ය පරිමාණ ගොවිපොළ සංවර්ධනය දිරි ගැන්වීම
• පශු සම්පත් ආශ්‍රිත නිෂ්පාදන ප්‍රවර්ධනය කිරීම හා අපනයනය සඳහා දිරිගැන්වීම
• මධ්‍යම හා මහා පරිමාණ ගව ගොවිපොළවල් ඉදිකිරීම සඳහා අවශ්‍ය ඉඩම් හා ආයෝජන පහසුකම් සැපයීම
• කුඩා හා මධ්‍යම පරිමාණ නිෂ්පාදකයින් ප්‍රවර්ධනය කිරීම තුළින් දේශීය නිෂ්පාදන හා පාරිභෝජන අවස්ථා පුළුල් කිරීම
• ශ්‍රී ලංකා සත්ත්ව නිෂ්පාදන හා සෞඛ්‍ය සේවයේ පරිපාලනය සහ පිරිස් කළමනාකරණය
• සත්ත්ව ආහාර සඳහා අවශ්‍ය බඩඉරිඟු රට තුළ වගා කිරීම සඳහා කටයුතු කිරීම
• ආයතනයන්ට පැවරී ඇති අනෙකුත් සියලුම විෂයන්ට අදාළ කටයුතු
• සියලුම ආයතනයන් අධීක්ෂණය කිරීම

v අමාත්‍යාංශයේ විෂය පථය යටතේ ක්‍රියාත්මක වන පශු සම්පත් අංශය යටතට ගැනෙන දෙපාර්තමේන්තු හා ව්‍යවස්ථාපිත ආයතන

• සත්ත්ව නිෂ්පාදන හා සෞඛ්‍ය දෙපාර්තමේන්තුව
• ජාතික පශු සම්පත් සංවර්ධන මණ්ඩලය හා ආශ්‍රිත සමාගම්
• මිල්කො (ප්‍රයිවට්) ලිමිටඩ්
• සී/ස මහවැලි සත්ත්ව ව්‍යාපාරික සමාගම

v පශු සම්පත් විෂයය යටතේ ක්‍රියාත්මක කරනු ලබන නීති සහ අණපනත්

• සත්ත්ව රෝග පනත (1992 අංක 59)
• සත්ත්ව ආහාර පනත (1986 අංක 15)
• සත්ත්ව පනත (1958 අංක 29)
• පශු වෛද්‍ය වෘත්තික පනත (1956 අංක 46)

3.පශු සම්පත් අංශය යටතේ ක්‍රියාත්මක වන ප්‍රධාන සංවර්ධන වැඩසටහන්

vසතුන් අභිජනනය කිරීමේ ගොවිපොළ ස්ථාපනය කිරීමේ වැඩසටහන

ක්ෂේත්‍රයේ උසස් ආරයේ එළ ගව හා මී ගව ගහණය වැඩි කිරීම මෙම වැඩසටහනෙහි මූලික අරමුණයි. මේ යටතේ රජයට අයත් හා පෞද්ගලික අභිජනන ගොවිපොළ සංවර්ධනය කිරීම, නවීන තාක්ෂණය භාවිතයෙන් ගව අභිජනනයට අදාළව පර්යේෂණ හා සංවර්ධන කටයුතු සිදු කෙරේ.

vකුඩා හා මධ්‍ය පරිමාණ පශු සම්පත් සංවර්ධනය (යටිතල පහසුකම් සංවර්ධනය)

‍පශු සම්පත් සංවර්ධනය සඳහා අවශ්‍ය යටිතල පහසුකම් සංවර්ධනය මෙහි මූලික පරමාර්ථයයි. රජයේ හා රජයේ ආයතන සතු ගොවිපොළ සංවර්ධනය, විසිතුරු මසුන්, කුකුළු මස් හා බිත්තර අපනයන පහසුකරණය සඳහා අපනයනකරුවන් හා අළුතින් එකතුවන ව්‍යවසායකයින් සඳහා පහසුකම් සැලසීම ආදී කටයුතු සිදු කෙරේ.

vකුඩා හා මධ්‍ය පරිමාණ පශු සම්පත් සංවර්ධනය (සංවර්ධන සහායන්)

කුඩා හා මධ්‍ය පරිමාණ කිරි ගව, කුකුළු හා සූකර ගොවිපොළ සඳහා හඳුනාගත් ගොවිපොළ යෙදවුම් සහනාධාර යටතේ ලබාදීම මෙහිදී සිදුකෙරේ.

vඑළු පාලනය තුළින් ජීවනෝපාය සංවර්ධනය යටතේ එළු සංවර්ධන ව්‍යාපෘතිය

රජයට අයත් තෝරාගත් ගොවිපොළ තුළ එළු අභිජනන ඒකක සංවර්ධනය කිරිම සහ පෞද්ගලික එළු ගොවිපොළ සඳහා හඳුනාගත් ගොවිපොළ යෙදවුම් සහනාධාර යටතේ ලබා දීම මෙහිදී සිදු කෙරේ.