English (UK)SinhalaSriLankaTamilIndia


ගොවියාත් පාරිභෝගිකයාත් සූරාකන එළවළු මාෆියාවට එරෙහිව රජයේ වැඩපිළිවෙල ඇර‍ඹෙයි.

image-01

පොරොන්දු මිල වෙනස් කළොත් දැඩි ක්‍රියාමාර්ග

 

v ගොවියාගෙන් සෘජුව මිලට ගත් එළවළු ආර්ථික මධ්‍යස්ථානයට

v ඊයෙට වඩා සෑම කිලෝවක්ම රුපියල් 50,40ක් අඩුවක්

v පසු අස්වනු හානිය අඩු කරමින් ප්‍රවාහනය සුරක්ෂිත ඇසුරුම්වල

v ලබන සතියේ සිට සියලු ආර්ථික මධ්‍යස්ථානවලට කෘෂිකර්ම අමාත්‍යාංශය හරහා එළවළු

v මිල ප්‍රදර්ශනය අනිවාර්යයි.

 

එළවළු මාෆියාවට එරෙහිව කෘෂිකර්ම අමාත්‍යාංශය මඟින් ගොවිබිම්වල ගොවි ජනතාවගෙන් සෘජුවම මිලට ගත් එළවළු නාරාහේන්පිට ආර්ථික මධ්‍යස්ථානය වෙත රැගෙන විත් අලෙවි කිරීමේ වැඩපිළිවෙල අද උදෑසන ආරම්භ විය. කෘෂිකර්ම ඇමති මහින්දානන්ද අලුත්ගමගේ, රාජ්‍ය අමාත්‍ය ශෂීන්ද්‍ර රාජපක්ෂ ඇතුළු ඊට අදාළ රාජ්‍ය නිලධාරින් ද අද උදෑසන නාරාහේන්පිට ආර්ථික මධ්‍යස්ථානයට පැමිණ පෞද්ගලිකව එම වැඩපිළිවෙල නිරීක්ෂණය කළේය. දිවයිනේ සියලු ප්‍රදේශවලට අයත් විවිධ වර්ගයේ එළවළු නව වැඩපිළිවෙල යටතේ කෘෂිකර්ම අමාත්‍යාංශය හරහා ක්‍රියාත්මක යාන්ත්‍රණයක් මඟින් ගොවියාගෙන් මිලට ගෙන ආර්ථික මධ්‍යස්ථානවල වෙළඳ ප්‍රජාවට අලෙවි කරන අතර, ප්‍රවාහන ගාස්තු පමණක් අය කරනු ලබයි. එම මිලට ගන්නා එළවළු සිල්ලර වෙළඳාමේදී කිලෝවකින් රුපියල් 20ක්, තොග කිලෝවකින් රුපියල් 10ක් ලෙස ලාභයක් පවත්වා ගනිමින් පාරිභෝගිකයාට අලෙවි කළ යුතු අතර, මිල ප්‍රදර්ශනය හා ප්‍රදර්ශනය කොට ඇති මිලට අලෙවි කිරිම අනිවාර්ය කොට ඇත. නව වැඩපිළිවෙල ක්‍රියාත්මක වූ අද දින දිවයින පුරා ආර්ථික මධ්‍යස්ථානවල ඊයේ දිනයේ එළවළු මිල ගණන් හා සන්සන්දනය කිරිමක් සිදු කළ අතර, ඒ අනුව සෑම එළවළු කිලෝවක්ම රුපියල් 40,50ක් අතර මිලකින් පහත හෙළීමට රජයේ නව වැඩපිලිවල සමත්ව ඇති බව සංඛ්‍යාලේඛන මඟින්ම සනාථ විය. මෙම සියලු එළවළු ප්ලාස්ටික් අසුරනයන්හි අසුරා රැගෙන එන අතර, 30%ක ප්‍රවාහනයේදී සිදුවන හානිය ඒ තුළින් නතරවන අතර, එහි ලාභය ද පාරිභෝගික ජනතාවට ලබාදීම නව වැඩපිළිවෙල තුළින් සිදු කෙරේ.

 

මෙහිදි අදහස් පළ කළ කෘෂිකර්ම අමාත්‍ය මහින්දානන්ද අලුත්ගමගේ මහතා “ පසුගිය දවස්වල එළවළු මිල ඉහළ ගියා. ජනාධිපතිතුමා අප කැඳවලා කිව්වා මේ සඳහා මැදිහත් වෙන්න වැඩපිළිවෙලක් හදන්න කියලා. ගොවියාටත්, පාරිභෝගිකයාටත්, වෙළෙන්ඳාටත් නැති ලාභයක් අතරමැදියන් පිරිසක් ගන්නවා. ඒක නතර කිරීම තුලින් පුළුවන් සාධාරණ මිලක් එළවළුවලට වෙළඳපොල තුළ නිර්මානය කරන්න. අපි අතගැහුවේ ඒ වැඩපිළිවෙලට. මේ තුළින් රජයක් විදිහට ගොවියාත්, පාරිභෝගිකයාත් මේ ආර්ථික මධයස්ථානවල වෙළඳාම් කරන වෙළඳ ප්‍රජාවත් තුන්ගොල්ලන්ම අපි ආරක්ෂා කරනවා. අද ඊයේට වඩා හැම එළවළු කිලෝවකින්ම රැපියල් 40- 50ත් අතර ගාණක් අඩුයි. ප්‍රවාහනය සඳහා කිලෝවකින් රුපියල් 5ක් වැනි සුළු මුදලක් පමණයි කෘෂිකර්ම අමාත්‍යාංශය අය කරන්නේ. ඒ සියලු ලාභය අපි පාරිභෝගිකයාට දෙනවා. මේක නියමු වැඩසටහනක් ලෙස අද ආරම්භ කළේ. අපි එන සතියේ සියලු ආර්ථික මධ්‍යස්ථානවල මෙම නව වැඩපිළිවෙල පටන් ගන්නවා.

 

මෙහිදී මාධ්‍ය වෙත අදහස් පළ කළ රාජ්‍ය අමාත්‍ය ශෂීන්ද්‍ර රාජපක්ෂ මහතා  නව වැඩපිළිවෙල පිළිබඳ අදහස් යෝජනා ගැටළු ඉදිරිපත් කරන්න පුළුවන්. ඒ අනුව අඩුපාඩු හදා ගන්න පුළුවන්. අපට ඕන වුනේ මේ මාෆියාවට එරෙහිව රජයක් ලෙස වැඩ කරන්න පුළුවන්. කියන එක පෙන්වීම. අපි මේ එළවළු ගේන්නේ ඇසුරුම්වල. ප්‍රවාහනයේදි සිදුවන හානිය අපට ඒ තුළින් නතර කරන්න පුළුවන් වෙලා තියෙනවා. ඒ තුල වු ලාභයත් වෙළෙන්ඳාට වගේම පාරිභෝගිකයාට හිමි වෙනවා. දවසක් හැර දවසක් ආකාරයෙන් උඩරට, වන්නි එළවළු කෘෂිකර්ම අමාත්‍යාංශය හරහා කොළඹට අපි ගේනවා.අපිට පුඵවන් මේ මාෆියාවට තිත තියන්න.

 

රජය මැදිහත්ව ගෙන යන නව වැඩපිළිවෙල අගය කරන බවයි නාරාහේන්පිට ආර්ථික මධ්‍යස්ථානයේ වෙළඳ ප්‍රජාව ප්‍රකාශ කලේ. එසේම ඒ සඳහා සියලු සහාය ලබා දෙමින් පාරිභෝගිකයාට සාධාරණයක් කරමින් අඩු මිලට වැඩි එළවළු ප්‍රමාණයක් අලෙවි කරමින් සැමට සාධාරණ ලෙස රජයේ වැඩපිළිවෙලට පූර්ණ සහාය ලබාදෙන බවද ඔවුන් අවධාරණය කළා. දිස්ත්‍රික් ලේකම්වරුන් ඒ යටතේ සේවය කරන රජයේ නිලධාරින් සහ ගොවි සංගම් සම්බන්ධීකරණයෙන් ක්‍රියාත්මක යාන්ත්‍රණයක් ඔස්සේ එම වැඩපිලිවෙල ක්‍රියාත්මකයි.කොළඹ දිස්ත්‍රික් ලේකම් ප්‍රදීප් යසරත්න,වී හා ධාන්‍ය,කාබනික ආහාර, එළවළු,පලතුරු, මිරිස්, ලූනු හා අර්තාපල් වගා ප්‍රවර්ධන, බීජ නිෂ්පාදන හා උසස් තාක්ෂණික කෘෂිකර්ම රාජ්‍ය අමාත්‍යාංශයේ ලේකම් අනිල් විජේසිංහ ඇතුළු රාජ්‍ය නිලධාරීන් සහ නාරාහේන්පිට ආර්ථික මධ්‍යස්ථානයේ වෙළඳ ප්‍රජාව ද මෙම සමාරම්භක අවස්ථාවට එක්ව සිටියා. 

image-02  image-03

image-04  image-05

image-06


Last Updated on බදාදා, 23 දෙසැම්බර් 2020 08:47

සමාජීය

කෘෂිකර්ම අමාත්‍යාංශය
 

80/5,

ගොවිජන මන්දිරය,

රජමල්වත්ත පටුමග,

බත්තරමුල්ල, ශ්‍රී ලංකාව.

දුරකථන : +94-11-2034300

 

ඊ- මේල් :  This email address is being protected from spambots. You need JavaScript enabled to view it.

This email address is being protected from spambots. You need JavaScript enabled to view it.

 

ප්‍රකාශන හිමිකම © 2019  කෘෂිකර්ම අමාත්‍යාංශය

සියලු හිමිකම් ඇවිරිණි

සැලසුම් නිර්මාණය